رامي بالتونسي

🎯 الهدف

كوّن تشكيلات بالكروط متاعك، نزّلهم على الطاولة، واخرج قبل الناس الكل.

🃏 الكروط

زوز بواكي كاملين + 4 جوكرات (108 كارطة). كل لاعب ياخو 14 كارطة، والموزّع ياخو 15: هو اللي يحل الجرية، يرمي كارطة بلا ما يسحب، والمرمية تبدا فارغة.

🔄 كيفاش يمشي الدور

1️⃣ اسحب كارطة: من الكومة المغلوقة ولا الكارطة المرمية (الموزّع في اول دورة ما يسحبش).
2️⃣ نزّل تشكيلات كان تنجم (موش اجباري).
3️⃣ ارمي كارطة باش يكمل دورك.

✅ التشكيلات الصحيحة

سلسلة: 3 كروط ولا اكثر من نفس اللون متتابعين، مثال: 5♥ 6♥ 7♥
الآس ينجم يجي قبل الزوز (A-2-3) ولا بعد الملك (Q-K-A)، اما ما يدورش (K-A-2 ❌).

باكو: 3 ولا 4 كروط من نفس الرقم بألوان مختلفة، مثال: K♠ K♥ K♦

الجوكر: يعوّض اي كارطة، اما جوكر واحد برك في كل تشكيلة.
🃏 سحب الجوكر: كان جوكر على الطاولة وعندك الكارطة اللي يعوضها، بدّلها بيه في دورك (بعد ما تهبط)، حط كارطتك واخو الجوكر.

🗳 الفريش (تصويت البداية)

بعد التوزيعة وقبل ما تبدا اللعبة، كل واحد يقول: «فريش» (كروطي ما يتلعبش بيهم) ولا «نلعب». كان الكل قالوا فريش، التوزيعة تتعاود والكروط يوزعهم اللاعب الجاي.

⬇️ الهبوط (اول تنزيلة)

اول مرة باش تهبط، لازم مجموع التشكيلات اللي تنزلهم في نفس الدورة يكون 71 نقطة ولا اكثر.

⬆️ وكان فما لاعب هبط قبلك، لازمك تهبط بـاكثر من الهبوط الاخير، مثال: هبط واحد بـ76، اللي بعده لازمو 77 ولا اكثر.

حساب النقاط: الكروط العادية بأرقامها · الصور (J Q K) = 10 · الآس = 10 ديما (حتى في A-2-3) · الجوكر = قيمة الكارطة اللي يعوضها.

🔓 بعد الهبوط

نزّل اي تشكيلة بلا حد ادنى، وزيد كروط وحدة وحدة على تشكيلات اي لاعب على الطاولة.

⏱ الوقت

عندك دقيقة للدورة، و15 ثانية لتصويت الفريش. كان ما لعبتش، السيستام يسحب كارطة ويرمي في بلاصتك باش الطاولة ما تتسكرش.

⚠️ قاعدة مهمة

الكارطة المرمية ما تهزها كان باش تستعملها في نفس الدورة، تهبط بيها، تزيدها على باكو، ولا تفرش. والا اسحب من الكومة.
الكارطة اللي هزيتها: يا تلعبها، يا ترجعها للمرمية كيما هي (دورة ضايعة)، اما ما تنجمش ترمي كارطة اخرى وهي في يدك.
وكارطة تنجم تتحط على باكو موجود في الطاولة، ما تنجمش ترميها، العبها ولا ارمي غيرها.

🎉 الفرشت

اللي يكمّل كروطه الكل يربح الجرية، فرشت! ودايما لازم تصفّي بكارطة ترميها في المرمية، ما تنجمش تنزّل آخر كارطة في باكو.
تنجم تفرشت في ضربة وحدة من غير ما تهبط قبل (بلا حد ادنى)، اما فرشت هي فرشت: نفس الحساب في الحالتين، ما فماش دوبل.
وكان الكومة تكملت وتخلطت مرتين وحتى حد ما فرشت، الجرية تتعادل، حتى نقاط عقوبة، وتتعاود التوزيعة 🤝

🧮 الحساب والربح

اللي تبقالهم كروط في يدهم ياخذو نقاط عقوبة: الكروط بأرقامها، الصور 10، الآس 10، الجوكر 0 (ما يحسبش).
اللي خسر الجرية وما هبطش حتى مرة ياخو 100 نقطة كيما هي، مهما كان في يدو.
🃏 اللي يفرشت بجوكر (يرميه في الاخر) يختار لاعب من الطاولة ياخو 100 نقطة زايدة.
اللي يوصل لحد الطاولة (500 / 700 / 1000) ولا يفوتو يخرج من اللعبة. آخر واحد يبقى هو الرابح 🏆